Chanchin tha lawmawm em em

Krismas kan thleng leh tep ta… Hlaphuahtuin “Kumpuisul a lo vei chang hian lunglen a tho leh thin..” a lo tih angin lunglen a tho leh ta…Mitamtak tan chuan Krismas a lo thlen hian chhungkimte a hmunkhat a hman tumin tuipui ralamite pawh an hawng sung sung thina, chhungkua hlimtlang tak leh lawm takin an hmang thin. Mahse mithenkhattan erawh chuan chhungkim thei lo, lusunfate an lo nih bawk chuan Krismas ah hian hlimna leh lawmna aiin mittui tlakna leh lunglenna in an hmang thung.Mi thenkhat chu chhungte leh thenrual awmlohna ah khawhar takin an hmang ve thung. Keini chhung pawh ka pu Upa Lalliana’n (Zovi pa) in April thla khan mual min liam a chhung kan kim tawh lo. Tin keini nupa kan zirna Malaysia atangin kan hawng thei si lova, krismas hman tur pawh kan hlim lo hle. “Tun kum Krismas hian lawmna leh hlimna ai in tahna leh mittui tlakna a tam zawk mai ang aw!” tih hi ka ngaihtuah ta. A biktakin Rangon kan chhungte chanchin leh an lunglen thute kan hre phei chu.. lung alengin kan ngaihtuah hlawm khawp mai. Krismas hla thiam leh mawitaka sate pawh kan ngaithla ngam lo a ni ber mai…. “I lungngaihna chu puan ang hlip rawh… dam lai ni leh lusun fate chantawk hi dawn ve teh..chhungkim darang lenlai ka ngai zual thin… a then thinlaina pawh hi dam rawh se…”. Han ngaihthlak liam puat leh hlimtaka sak a hara, miin hlimtaka an sa pawh en a nuam ta lo hle.
Mahse kan Bible ah kan bih chian chuan, Van angel chuan berampute hnenah chuan.. “Chanchin tha lawmawm em em?... “The good news of great joy” (Luka 2: 10,11) an thlen a. Chu chanchin chu lawmna chanchin tha a ni. Engvangin nge lawmna chanchin tha a nih tlat?
1. Thihna thim hnuaia thute tan enna ropui/lawmna ropui an hmuh theih avangin (Isaia 9:2)
2. Pathian kan hnenah a lo thlen avangin (Johana 1:14)
3. Pathian leh mihringte in karah remna (Remna Lal) a siam avangin (Isaia 9:6;Ephesi 2: 13-14)
4. Sualbawih ata min chhandamtu “Isua” a nih avangin (Matthaia 1:21)
5. Tupawh a ring apiangte hnenah Pathian fate nihna a pek avangin (Johana 1:12-13)
Sawi dawn chuan a hun leh a hmun a zirin tamtak a awm thei ang…Chuvangin, lunglen ti zual, mittuitlak ti tamtu “Krismas” nimahse, a lo piang “Lal Isua” erawh chu hlimna leh lawmna chanchin tha lawmawm em em thlentu chu a ni. Chu chanchin tha lawmawm em em chuan lunsun chhungkua zawngzawngte hnenah mihring rilru reng renga ngaihtuah phak loh lawmna thlen mawlh rawh se. Tun krismas hian hlimna leh lawmna chhungkua, khawtlang leh kohhran tinah thlen se ti hi ka tawngtaina a ni. AMEN